Биыл қоғам белсенділері облыстың оқушыларын тегін тамақпен қамтамасыз ету қажеттігін алға тартқан болатын. Бұл мәселені өңір басшысы Айдарбек Сапаров назарға алды, деп хабарлайды Qyzyljarnews.kz тілшісі.
Облыстық мәслихат депутаттарының бірінші сессиясында Айдарбек Сапаров халық қалаулылары алдында сөз сөйлеп, жаңа оқу жылынан бастап бастауыш сынып оқушылары тегін тамақпен қамтамасыз етілетінін жеткізді.
– Оқушылар мен олардың ата-аналары үшін жақсы жаңалық айтқым келеді. Жаңа оқу жылынан бастап 1-4 сынып аралығындағы барлық оқушыларды тегін ыстық тамақпен қамтамасыз етеміз. Осының арқасында ата-аналар отбасылық бюджетті үнемдей алады. Қазір облыс бойынша аз қамтылған және көпбалалы отбасылардан шыққан балалар тегін ыстық тамақпен қамтамасыз етілгенін атап өткім келеді, — деді СҚО әкімі Айдарбек Сапаров.
