СҚО-дағы әрбір үшінші интернет-алаяқтық «банктен қоңырау шалу» схемасы арқылы жасалады, деп хабарлайды Qyzyljarnews.kz тілшісі.
Жыл басынан бері Петропавл қалалық полиция басқармасының бірінші бөлімінде интернет-алаяқтықтың 77 фактісі тіркелді. Тәртіп сақшыларының сөзінше, мұндай қылмыс түрін алдын алу мақсатында профилактикалық шаралардың маңызы зор.
Бірінші полиция бөлімінің бастығы Тілеген Әлжанов Жамбыл көшесіндегі үйлердің тұрғындарымен кездесті. Бұл аумақтағы қалалықтардың көбі – зейнеткерлер. Қарияларға алдаудың негізгі схемалары туралы айтылды. Жыл басынан бері облыста 182 адам жалған сценарийдің құрбаны болды. Бұл ретте өңірде 9 айда барлығы 516 интернет-алаяқтық тіркелген.
– Ресми арналар арқылы сізден ақша талап ететін немесе қандай да бір қаржылық операциялар жасалатын кез келген ақпаратты міндетті түрде тексеріп алыңыз. Бұл алаяқтық желілерден аулақ болудың ең сенімді әдісі. Көбінесе алаяқтар WhatsApp-қа қоңырау шалып, зейнет жасындағы адамдарға оңай әсер ететін психологиялық қысым жасайды. Полиция қызметкерлері мұндай қылмыстардың алдын алуды жалғастыратын болады, – дейді Тілеген Әлжанов.
