Петропавлдағы Назарбаев көшесінде тұратын 315 пәтер иесі бірнеше күннен бері газсыз отыр. Оның себебі – көпқабатты үйдің қасбетінде орналасқан газ құбырына «Газель» көлігі соғылған, — деп хабарлайды Qyzyljarnews.kz тілшісі.
Назарбаев көшесі, 290, 292 және 294 үйлердің тұрғындары 5 қарашадан бастап газ жоқ деп шағымдануда. Олардың сөзінше, газ құбырына соғылған көлік салдарын мамандар түзетуге асық емес.
Әкімдік мамандары газ құбырына соғылған «Газель» пластикалық терезелерді орнатумен айналысатын компанияға тиесілі екенін айтады.
— Дайындық жұмыстары жүргізілуде, 8 қарашада қалпына келтіріле бастайды. Көпқабатты үйлерге газ қарашаның 10-ы күні беріледі. Газды іске қосу кезінде апатты жағдайларды болдырмау үшін пәтер тұрғындарының үйлерінде болуы қажет, — дейді қала әкімдігінің баспасөз қызметі.
