Солтүстік Қазақстан облысының медициналық мекемелерін құрал-жабдықтармен жабдықтауға 5,5 млрд теңге бөлінді. Бұл туралы облыс басшысы Айдарбек Сапаров мәлім етті, деп хабарлайды Qyzyljarnews.kz тілшісі.
— Денсаулық сақтау саласын қаржыландырудың жыл сайынғы ұлғаюы арқасында диагностика деңгейі мен медициналық қызмет көрсету сапасы жақсарды. Жалпы, өлім-жітім деңгейі 16%-ға азайды. Оның ішінде қан айналымы жүйесі ауруларынан 12%-ға, инсульттерден 24%-ға, туберкулездің таралуынан 5%-ға төмендеді. Денсаулық сақтау саласын қаржыландыру биыл 56%-ға ұлғайып, жалпы сомасы 17 миллиард теңгеге жетті», — дейді Айдарбек Сапаров.
СҚО әкімінің айтуынша, «Ауылдағы денсаулық сақтауды жаңғырту» ұлттық жобасы аясында өңірде 46 медициналық нысан салу жоспарланған. Бұл — фельдшерлік-акушерлік пункттер, дәрігерлік амбулаториялар мен медициналық пункттер. Өңірді дамытудың кешенді жоспарын іске асыру шеңберінде күзде қаланың жаңа шағын аудандарында ауысымына 250 адам қабылдайтын 2 емхана ашылады. Уәлиханов ауданының әкімшілік орталығы – Кішкенекөл ауылында 250 адам қабылдайтын емхананың құрылысы басталды.
Сондай-ақ, өңір әкімі медициналық мекемелерді құрал-жабдықтармен жабдықтауға 5,5 миллиард теңге бөлінгенін айтты. Санитарлық автокөлік паркі жаңартылып, жыл басында аудандық ауруханаларға 14 санитарлық көлік берілді. Тағы 18 көлік сатып алу жоспарланып отыр.
— Кадр тапшылығы мәселесін шешу үшін көтермеақы мөлшері ұлғайтылды. Анестезиолог-реаниматологтер, акушер-гинекологтер, онкологтер сияқты аса сұранысқа ие мамандықтардың дәрігерлері 5 миллион теңге мөлшерінде біржолғы төлем алады, — дейді А. Сапаров.
