Қалалық прокуратураның мамандары петропавлдық кәсіпкерге көмекке келді, деп хабарлайды Qyzyljarnews.kz тілшісі.
Автосалон ашқысы келген кәсіпкер үш ай бойы қажетті құжаттарын жинай алмай әлек болды. Кейін бизнесмен СҚО прокуратурасының фронт-офисіне өтініш қалдырды. Қалалықтың мәселесін шешуге прокурорлар көмектесті.
Белгілі болғандай, кәсіпкер қала аумағында құны 1,5 миллиард теңге болатын мультибрендтік автосалон салуды көздеген. Алайда сәулет-жоспарлау тапсырмасын алуда қиыншылықтарға тап болған. Жергілікті атқарушы орган өкілдері 3 айдан астам уақыт бойы кәсіпкерге жобалық-сметалық құжатын әзірлеу рәсімін кешіктірген.
— Прокуратура органдары мен «KAZAKH INVEST»ҰК» АҚ-ның өкілдерінің араласуымен «Тобыл Моторс» ЖШС-қа құжат берілді. Өз кезегінде, кәсіпкерге автосалон салуға кірісуге және одан әрі инвестициялық жобалардың республикалық пулына кіруге мүмкіндік берді, – делінген облыстық прокуратураның таратқан мәліметінде.
