Биыл 6 айдың ішінде ел аумағында 4,6 млн. әкімшілік құқық бұзу фактісі тіркеліп, 4,5 млн. тұрғын жауапқа тартылды. Жылдың алғашқы жартыжылдығынжа СҚО полиция департаменті қызметкерлерімен 129 503 іс қозғалған, деп хабарлайды Qyzyljarnews.kz тілшісі.
Бас прокуратураның құқықтық статистика және арнайы есепке алу комитеті ұсынған ақпаратқа сәйкес, биылғы 6 ай ішінде 4 669 330 әкімшілік құқық бұзушылық тіркелді. Бұл өткен жылдың ұқсас кезеңімен салыстырғанда 12,1%-ға көп (2022 жыл — 4 164 953 іс) болып отыр.
Үстіміздегі жылы 4 521 580 азамат әкімшілік жауапкершілікке тартылды, бұл да былтырмен салыстырғанда 17,6%-ға артық (2022 жыл — 3 846 080). Тоқтатылған істердің саны өткен кезеңмен салыстырғанда 9,5%-ға (76 944-ден 84 217-ға дейін) өсті.
Әкімшілік құқық бұзу фактілері әсіресе Алматы, Астана қалалары мен Түркістан облысында көп тіркелген. Ал Абай, Ұлытау және Жетісу облыстарында жасалған құқыққа қайшы әрекеттер аз. СҚО-да 129 503 іс қозғалды.
Биыл тәртіп бұзғандарға 91 млрд. 316 млн теңгеден астам айыппұл салынды. Өткен жылы осы аралықта 71 млрд 497 млн теңгеге әкімшілік хаттама толтырылған еді.
— Салынған әкімшілік айыппұлдың 58 млрд. 474 млн теңгесі өндіріп алынды. Жалпы, айыппұл өндіру дәрежесі — 64%. Өндіріп алынбаған соманың қалдығы – 32 млрд 841 млн теңге, — делінген құқықтық статистика және арнайы есепке алу комитетінің дерегінде.
Айыппұл өндіру деңгейі жоғары өңірлер:
— Павлодар облысы — 96,1%;
— Батыс Қазақстан облысы — 78,8%;
— Ұлытау облысы — 77,9%;
— Ақмола облысы — 75,7%.
Бұл ретте өңірлер арасында Жамбыл облысында (27,9%) айыппұл өндіру өте төмен.
