СҚО әкімінің орынбасары қызметін атқарған Сәтжан Аблалиев Көлік министрлігінің вице-министрі болып тағайындалды, деп хабарлайды Qyzyljarnews.kz тілшісі.
Сәтжан Айтенұлы Аблалиев облыс әкімінің орынбасары қызметінен босатылып, ҚР Үкіметінің қаулысымен еліміздің Көлік министрлігінің вице-министрі лауызымына тағайындалды.
Алматы автомобиль-жол институтын және Қазақстан қатынас жолдары университетiн инженер-құрылысшы, инженер-экономист мамандықтары бойынша тамамдаған.
Еңбек жолын 1987 жылы Оңтүстiк-Ембi мұнай барлау экспедициясының орталық инженерлiк-техникалық қызметiнiң оператор-коллекторы болып бастады. 1996-2004 жылдары Қазақ көлiк және коммуникация академиясында түрлi лауазымдарда қызмет еттi. 2004 жылдан Автомобиль жолдары комитетiнде басшылық лауазымдарды атқарды.
2012 жылдан Автомобиль жолдары комитетi төрағасының орынбасары болды. 2021 жылғы 7 маусымнан осы тағайындауға дейін Солтүстiк Қазақстан облысы әкiмiнiң орынбасары қызметін атқарды.
Облыстық әкімдіктің баспасөз қызметінің мәліметінше, Сәтжан Аблалиевтің орнына әзірге ешкім тағайындалған жоқ.
