Тайынша ауданында жеңіл автокөлікті тізгіндеген жүргізуші жылқыны қағып кетті, деп хабарлайды Qyzyljarnews.kz тілшісі.
Оқиға түнгі сағат 03:30-да «Көкшетау – Омбы» тас жолының 50-ші шақырымында орын алған. Жүргізуші «Lada Granta» маркілі «темір тұлпарды» тізгіндеген. Ол Ақжар ауданының 58 жастағы тұрғыны болып шықты. Жүргізуші Аймақ ауылынан 5 шақырым жерде жолға кенеттен бір табын жылқы шыққанын байқайды. Ер адам көлікті тоқтатуға тырысқан. Онысынан нәтиже шықпапты.
– Аудандық полиция бөлімінің қызметкерлері табын иесін анықтап жатыр. Ол ҚР Әкімшілік құқық бұзушылық туралы Кодексінің 408-бабының 2-бөлігі бойынша жауапкершілікке тартылатын болады. Мал жаю қағидаларын бұзу жол-көлік оқиғаларына алып келуі мүмкін екенін естен шығармаған жөн, – дейді аудандық ПБ бастығы Нұрлыжан Ақтанов.
СҚО ПД әкімшілік полиция басқармасы ұсынған мәліметке сәйкес, тәртіп сақшылары 11 айда ҚР ӘҚБтК-нің 408-бабы бойынша 3440-тан астам хаттама толтырған. Сондай-ақ тәртіп сақшылары Солтүстік Қазақстан облысының автожолдарында еліктердің көбеюіне байланысты жүргізушілерді сақ болуға шақырады.
