Облыс полицейлері бір аптаның ішінде тұрғындардан 18 қару тәркіледі, деп хабарлайды Qyzyljarnews.kz тілшісі.
Полицейлер 56 жастағы Петропавл тұрғынының үйінен тіркелмеген «ТОЗ-16» мылтығы мен 29 оқ-дәрі мен гильзалар тапты. Петропавлдықтың айтуынша, бұл заттардың бәрі оған әкесінен мұра болып қалған.
Дәл осындай факті Тимирязев ауданында да тіркелді. Ауыл тұрғынынан «ИЖ-17» мылтығы тәркіленді.
Полицейлер туыстарынан қалған қаруды қазіргі иесі міндетті түрде тіркеуі немесе комиссиялық сатуға тапсыруы қажеттігін ескертеді. Шешім қабылданша қару мен оқ-дәрілерді полицияға сақтау үшін беру керек.
Ақжар ауданы тұрғынының қорасынан полиция қызметкерлері «ИЖ-18» мылтығын тауып алды. Ер адамның айтуынша, мылтықты өткен күзде ол Кіші Қараой көлінің жанындағы қамыстан тауып алған.
Мамлют ауданының тұрғынынан да қару тәркіленді. Оның гаражынан «ИЖ-17» мылтығы табылды.
– Бұл фактілердің барлығы облыста 5 сәуірден бастап өткен «Қару» жедел алдын алу іс-шарасы аясында анықталды. Мақсат – халықтың қолында қылмыс жасау үшін пайдаланылуы мүмкін тіркелмеген қаруды анықтау. 7 күн ішінде облыс тұрғындарынан 18 тіркелмеген атыс қаруы, оның ішінде екі шолақ мылтық пен тапанша тәркіленді. Барлық фактілер бойынша сараптамалар тағайындалды, олардың нәтижелері бойынша процестік шешімдер қабылданатын болады, – деді СҚО ПД криминалдық полиция басқармасының бастығы Марат Жұмалиев.
