Биыл өңірдің су қоймаларына 1 млн-нан астам тұқы шабағы жіберіледі, деп хабарлайды Qyzyljarnews.kz тілшісі.
Облыстағы өзен-көлдерге балықтың шабақтары көктем және күз мезгілдерінде жіберіледі. Петропавл балық питомнигі қызметкерлерінің айтуынша, біреуінің салмағы 12 грамнан кем түспеуі қажет.
— Үш айдың ішінде 1 млн-нан астам тұқы шабағы өсірілді. Енді оларды суға жіберу қажет. Әрине дені қоршаған ортаға бейімделе алмауы мүмкін. Десе де өзен-көлдердегі экологиялық жүйені түрлендіріп, балық санын көбейту үшін тексерістен өткен шабақтар суға жіберіледі, — дейді «Есіл облысаралық бассейндік балық шаруашылығы инпекциясы» РММ басшысының орынбасары Марат Есімсейітов.
Мамандар тұқы балығының 450 мыңын Петропавл су қоймасына, Сергеев су қоймасына тағы 560 мыңы жібергенін атап өткен жөн.
