Биыл Петропавлда 47 көпқабатты үйдің құрылысы жүргізіліп, бүгіндері 9 баспана халық игілігіне берілді, деп хабарлайды Qyzyljarnews.kz тілшісі.
Көпқабатты баспаналар «Жас өркен», «Орталық», «Береке» және «Копай» шағынаудандарында тұрғызылып жатыр. 18 үйдің құрылысына жергілікті бюджеттен қаржы бөлінсе, 29-ы құрылыс компаниялары өз қаражаты есебінен салуда. Бұл ақпаратпен қала әкімі Серік Мұхамедиев Петропавл жоғары құрылыс-экономикалық колледжінде өткен халықпен кездесуде бөлісті.
— Жыл соңына дейін 20 көпқабатты баспананың құрылысы аяқталмақшы. Нәтижесінде 2 мыңнан отбасы құтты қоныстарының кілттерін алады. Бүгіндері баспаналардың аулаларын абаттандыру жұмыстары істелініп, 16 үйге инженерлік-коммуникациялық инфрақұрылым желілері тартылуда.
Халық игілігіне берілетін көпқабатты үйлерге әлеуметтік аз қамтылған отбасылардан шыққан 600 тұрғын қоныстанбақ. Баспаналардың барлығы «Береке» шағынауданында орналасқан, — деді қала әкімі Серік Мұхамедиев.
