Мемлекеттік хатшы Ерлан Қарин өзінің Telegram-арнасында Ұлттық құрылтайдың алғашқы отырысы 16 маусым күні Ұлытауда өтетінін жазды, деп хабарлайды Qyzyljarnews.kz тілшісі.
— 16 маусым күні Ұлытау облысында Ұлтық құрылтайдың алғашқы отырысы өтеді. Консультативтік-кеңесші органның құрамына Парламент депутаттары, Қазақстан халқы Ассамблеясының, азаматтық қоғам мен саяси партиялардың өкілдері, кәсіпкерлер мен сарапшылар, сонымен қатар өңірлік қоғамдық кеңестердің мүшелері кіреді. Ұлттық құрылтайдың міндеттерінің бірі – қоғамдық бірігуді одан әрі дамыту бойынша идеялар ұсынып, қадамдар жасау, — деп жазды Ерлан Қарин.
Ел Президенті Қасым-Жомарт Тоқаев 16 наурызда Қазақстан халқына жолдаған Жолдауында Ұлттық құрылтай құруды ұсынды.
-Біз бірлігіміздің бастауы болған дала демократиясын жаңғыртуымыз керек. Ұлттық қоғамдық сенім кеңесі өз міндетін табысты атқарды. Енді оның орнына құрамы жағынан ауқымды ұлттық құрылтай құруды ұсынамын, — деді Қасым-Жомарт Тоқаев.
Мемлекет басшысының айтуынша, Ұлттық құрылтай қоғамдық диалогтың бірыңғай институционалдық моделін қалыптастыруы тиіс.
-Осылайша құрылтай билік пен халық арасындағы дәнекерге айналады. Қазіргі қоғамдық кеңестің бәрін өз айналасына топтастырады. Ұлттық құрылтайдың құрамында барлық аймақтың өкілдері болады,-деді Президент.
Фото: ашық дереккөздерден
